Een woord van onze Beschermheer Frans Pollux. Dansende manne. D'r gaon daag veurbeej det ik 't d'r neet euver heb. Asse vruuger op de basisschoël zags desse op danse zoots, woorse raar aangekeeke. Op de middelbare schoël woorse rôndoét veur gek verklaord. Maar det waare dan auk de duustere jaore negetig, in mien geval. Inmiddels laeve we in zô'nnen hippen tiéd det dansende manne beej So You Think You Can Dance lusobjekte veur meinig jônge vrouw vorme. 't Meug dan auk gen wônder heite det de Venlose Karrewaansgarde met enne succesvolle opmars bezig is. Dansende manne zien in. Met de goddelijke liéve van die So You Think You Can Dancers meuge we ze netuurlik neet vergeliéke. Maar met enne nog laevende Michael Jackson, toch auk enne man van vieftig, zeker waal. Jackson imponeerde toeschouwers met zien bewaeginge, en had d'r zelf plezeer in. Die twië elemente zien auk aanwezig in de joeksige buunprissentaasie van de Karrewaansgarde. Zeej straole plezeer oét, ze doon iets waat nörges anders in Limburg op dees wiés wuurt gedaon, en ze imponere daomei 't publiek. Ik heb 't regelmaotig meigemak det de argwanende blikke van toeschouwers ('gaon die danse? Det guuf 't neet') nao éin nummer al veranderd waare in bewôndering. Want aan de dans is te zeen det d'r tiéd aan wuurt bestaejt. De manne rippeteere. Met ein echte choreografe. Ze werke. Ze zweite. En ze buize neet veur ein optraeje. Want zoë zien de ech gooje gezelschappe in vastelaoveskringe te herkinne: zeej neeme de schaele wazel dae ze bringe doëdserieus. Det is de Karrewaansgarde in optima forma. Op alle details is gelet. Uig die prachtige pakke, det decorum en die strakke gezichter beej 't opkômme. Span det knôn en herres die concentratie. Allein dan, met die toewijding, kinse 't publiek vermaake op 't niveau det de Karrewaansgarde bringk. Ik bin d'r gruüts as beschermhiër de blijde boodschap van dit biezôndere gezelschap te meuge verkôndige. Auk al kin ik veur genne maeter vloeiend bewaege: weldra zal Venlo bekind staon as 't Stedje van Lol, Dans en Plezeer.  Vastelaovend saame,  Frans Pollux